डीजेच्या कर्कश आवाजामुळे गमावली श्रवणशक्ती, पण आत्मविश्वासाच्या जोरावर मिळवले घवघवीत यश
माळेगाव प्रतिनिधी —
प्रतिकूल परिस्थिती आणि कर्णबधिरतेवर मात करत बारामती येथील नियुक्ती अमोल खरात हिने दहावीच्या परीक्षेत ८९.२० टक्के गुण मिळवत प्रेरणादायी यश संपादन केले आहे. तिच्या या संघर्षमय यशाची सर्वत्र चर्चा होत असून विविध स्तरातून तिचे कौतुक केले जात आहे.लहानपणी एका लग्न समारंभात डीजेच्या कर्कश आवाजामुळे नियुक्तीला दोन्ही कानांनी ऐकू येणे बंद झाले. आर्थिक परिस्थिती हलाखीची असतानाही तिच्या कुटुंबियांनी अनेक मोठ्या रुग्णालयांत उपचार केले. कानाची मशीन लावूनही अपेक्षित फायदा झाला नाही. मात्र या संकटासमोर न झुकता नियुक्तीने शिक्षणाची जिद्द कायम ठेवली.
तिने विद्या प्रतिष्ठानच्या विनोद कुमार गुजर बाल विकास मंदिर इंग्रजी माध्यमाच्या शाळेत शिक्षण घेतले. शिक्षकांच्या ओठांच्या हालचाली समजून घेत अभ्यास करणारी नियुक्ती कोणतीही खाजगी शिकवणी न लावता स्वअध्ययनाच्या जोरावर यशस्वी ठरली. तिच्या अभ्यासात आई स्वाती, वडील अमोल खरात आणि मोठी बहीण श्रृती यांनी मोलाची साथ दिली.या यशाबद्दल शाळेचे प्राचार्य आशिष घोष व वर्गशिक्षिका खोडवे यांनी तिचे अभिनंदन केले आहे.
“माझे आदर्श डॉ. बाबासाहेब आंबेडकर आहेत. उच्च शिक्षण घेऊन मोठी अधिकारी बनण्याचे माझे स्वप्न आहे,” अशी भावना नियुक्ती खरात हिने व्यक्त केली.
✍🏻मुख्य संपादक – शशिकांत खरात
