प्रतिनिधी :-
बहुजन समाज पार्टीच्या बारामती शहराध्यक्षपदी उच्चशिक्षित व सामाजिक जाण असलेले भास्कर दामोदरे यांची निवड करण्यात आली आहे. बारामती शहराला पहिल्यांदाच उच्च शिक्षण घेतलेले शहराध्यक्ष लाभल्याने पक्षासह सामाजिक क्षेत्रातही या निवडीचे स्वागत होत आहे.
पक्ष संघटना अधिक मजबूत करणे, बहुजन समाजातील विविध घटकांना एकत्र आणणे आणि पक्षाची ध्येयधोरणे तळागाळापर्यंत प्रभावीपणे पोहोचवणे या उद्देशाने ही निवड करण्यात आल्याची माहिती बहुजन समाज पार्टीचे महाराष्ट्र प्रदेश महासचिव काळुरामजी चौधरी यांनी दिली.
या निवडीमुळे बारामती शहरातील बहुजन समाज पार्टीच्या कार्यकर्त्यांमध्ये उत्साहाचे वातावरण निर्माण झाले आहे. सामाजिक न्याय, समता आणि संविधानिक मूल्यांच्या आधारावर संघटन वाढविण्याचा निर्धार नवनियुक्त शहराध्यक्ष भास्कर दामोदरे यांनी व्यक्त केला आहे.
दुर्लक्षित व दुर्बल घटकांतील मुलांच्या शिक्षणासाठी विशेष प्रयत्न करणे, युवकांसाठी रोजगाराच्या संधी निर्माण करण्यासाठी पाठपुरावा करणे तसेच समाजातील मूलभूत प्रश्नांवर ठामपणे आवाज उठवणे, या मुद्द्यांवर आपले विशेष लक्ष राहील, असे दामोदरे यांनी सांगितले. अध्यक्षपदाची जबाबदारी स्वीकारण्यापूर्वीही त्यांनी शिक्षण, रोजगार आणि सामाजिक समस्यांवर सक्रियपणे काम केले असून, पुढील काळात हे कार्य अधिक व्यापक स्वरूपात राबवले जाणार असल्याचे त्यांनी स्पष्ट केले.
यावेळी पक्षाच्या विविध पदाधिकाऱ्यांनी भास्कर दामोदरे यांचे अभिनंदन केले. शहर पातळीवर संघटनात्मक बांधणी मजबूत करणे, जनसंपर्क वाढविणे आणि सर्वसामान्य नागरिकांच्या प्रश्नांना वाचा फोडण्यासाठी बहुजन समाज पार्टी अधिक सक्रिय राहील, असा विश्वास उपस्थित पदाधिकाऱ्यांनी व्यक्त केला.
✍🏻मुख्य संपादक – शशिकांत खरात
