बारामती, दि. १५ फेब्रुवारी २०२६ :
महाशिवरात्री यात्रेनिमित्त श्री स्वामी समर्थ मंदिर परिसरात बंदोबस्तासाठी तैनात असलेल्या होमगार्ड जवानावर एका व्यक्तीने मारहाण केल्याची गंभीर घटना उघडकीस आली आहे. या प्रकरणी बारामती शहर पोलीस स्टेशन येथे गुन्हा रजिस्टर क्रमांक 70/2026 अन्वये भारतीय न्याय संहिता (BNS) कलम 132, 121(1), 115(2), 351(2)(3), 352 प्रमाणे आरोपी विकास दादा लोंढे (रा. अनंतनगर आमराई, ता. बारामती, जि. पुणे) याच्याविरुद्ध गुन्हा दाखल करण्यात आला आहे.
महाशिवरात्रीच्या निमित्ताने श्री स्वामी समर्थ मंदिर येथे मोठ्या प्रमाणावर भाविकांची गर्दी झाली होती. वाहतूक नियंत्रण व गर्दी नियमनासाठी होमगार्ड जवान सिद्धार्थ भारत शिंदे हे अधिकृत गणवेशात व नेमप्लेटसह कर्तव्य बजावत होते. वरिष्ठ अधिकाऱ्यांच्या आदेशानुसार बॅरेकेटिंगमधून कोणत्याही वाहनास प्रवेशबंदी करण्यात आली होती.
मात्र आरोपीने जाणीवपूर्वक मोटारसायकल आत नेण्याचा प्रयत्न केला. नियम समजावून सांगितल्यानंतर त्याने होमगार्ड जवानास अश्लील शिवीगाळ करून धमकी दिली आणि प्रत्यक्ष मारहाण केली. या घटनेमुळे शासकीय कामात अडथळा निर्माण झाला.
होमगार्ड म्हणजे काय?
होमगार्ड दल हे महाराष्ट्र पोलीस दलाचे पूरक सहाय्यक बल असून १९६२ पासून देश व राज्यातील आपत्कालीन परिस्थिती, नैसर्गिक आपत्ती, कायदा व सुव्यवस्था तसेच सार्वजनिक बंदोबस्ताच्या कामात महत्त्वाची भूमिका बजावत आहे. कायद्यानुसार होमगार्ड जवान हे “Public Servant” या श्रेणीत मोडतात. त्यामुळे त्यांच्या शासकीय कर्तव्यात अडथळा आणणे, धमकी देणे किंवा बलप्रयोग करणे हा गंभीर व दंडनीय गुन्हा आहे.
पोलिसांची कडक भूमिका
बारामती शहर पोलीस प्रशासनाने स्पष्ट शब्दांत जाहीर केले आहे की, कर्तव्य बजावत असलेल्या कोणत्याही पोलीस अधिकारी किंवा होमगार्ड जवानांवर हात उगारणाऱ्यांना कोणतीही सहानुभूती दाखवली जाणार नाही. अशा प्रवृत्तीविरुद्ध कठोर कायदेशीर कारवाई करण्यात येईल.
“कायद्यापुढे सर्व समान आहेत. शासकीय कामात अडथळा निर्माण करणाऱ्यांविरुद्ध शून्य सहनशीलतेची भूमिका अवलंबली जाईल,” असे प्रभारी पोलीस निरीक्षकांनी सांगितले.
नागरिकांना आवाहन
सार्वजनिक सुव्यवस्था राखण्यासाठी नागरिकांनी पोलीस व होमगार्ड दलास सहकार्य करावे, तसेच आपत्कालीन सेवा देणाऱ्या जवानांचा सन्मान राखावा, असे आवाहन प्रशासनाकडून करण्यात आले आहे.
✍🏻मुख्य संपादक – शशिकांत खरात
