📰 बातमी
बारामती (प्रतिनिधी):
बारामती तालुक्यातील परिसरात आकडे टाकून वीज चोरी मोठ्या प्रमाणावर सुरू असताना, यावर अद्याप ठोस कारवाई का होत नाही? असा थेट आणि महत्त्वाचा प्रश्न आता नागरिक उपस्थित करत आहेत. कारण ही वीज चोरी लपूनछपून नव्हे, तर दिवसा ढवळ्या, सर्वांच्या नजरेसमोर सुरू आहे.
या परिसरात थेट विद्युत तारेवर आकडे टाकून वीज वापरली जात असल्याचे चित्र अनेक वेळा पाहायला मिळते. तक्रारी, चर्चा आणि तोंडी माहिती असूनही महावितरणकडून नियमित तपासणी किंवा कारवाई होत नसल्याने संशयाचे वातावरण निर्माण झाले आहे.
वीज चोरीमुळे महावितरणचे आर्थिक नुकसान होत असून, त्याचा थेट फटका प्रामाणिक वीज ग्राहकांना बसत आहे. वारंवार वीज खंडित होणे, कमी-जास्त व्होल्टेज, ट्रान्सफॉर्मर जळणे अशा समस्यांनी नागरिक त्रस्त झाले आहेत.
याहूनही गंभीर बाब म्हणजे, उघड्या तारेवर टाकलेले आकडे हे अपघातास आमंत्रण देणारे आहेत. अशा बेकायदेशीर जोडण्यांमुळे कधीही मोठा अपघात होऊ शकतो. मात्र, अपघात होईपर्यंतच प्रशासन वाट पाहत आहे का? असा प्रश्न उपस्थित होत आहे.
विद्युत कायदा 2003 नुसार वीज चोरी हा गंभीर गुन्हा असून, दोषींवर दंड व कारावासाची तरतूद आहे. तरीही या कायद्याची अंमलबजावणी काही भागात होत नाही का? असा सवाल निर्माण झाला आहे.
नागरिकांची मागणी आहे की —
🔹 बारामती तालुक्यातील परिसरात तातडीने विशेष तपासणी मोहीम राबवावी
🔹 वीज चोरी करणाऱ्यांवर कारवाईचा स्पष्ट अहवाल जाहीर करावा
🔹 कारवाई का होत नाही, याचे कारण महावितरणने सार्वजनिक करावे.
आता खरा प्रश्न हा आहे —
वीज चोरी थांबवण्यासाठी प्रशासन पुढाकार घेणार का,
की “का होत नाही कारवाई?” हा प्रश्न कायम राहणार?
✍🏻मुख्य संपादक – शशिकांत खरात
