बारामती | प्रतिनिधी
बारामती तालुक्यात सध्या मोठ्या प्रमाणावर सुरू असलेल्या वीज चोरीबाबत तक्रार करण्यासाठी स्वतः नागरिक महावितरण कार्यालयात गेले असता, महावितरणाचे मुख्य अभियंता धर्मराज पेठकर यांनी थेट भेट देण्यास नकार दिल्याची धक्कादायक घटना उघडकीस आली आहे.
सदर नागरिक हे कोणत्याही वैयक्तिक कारणासाठी नव्हे, तर तालुक्यात सुरू असलेल्या वीज चोरीवर तातडीने कारवाई व्हावी या उद्देशाने मुख्य अभियंत्यांची भेट घेण्यासाठी गेले होते. मात्र, वीज चोरीसारख्या गंभीर व सार्वजनिक हिताच्या विषयावरही वरिष्ठ अधिकाऱ्यांनी भेट देण्यास स्पष्ट नकार दिला, हे विशेष.
महावितरणकडून वीज चोरी रोखण्यासाठी वेळोवेळी मोहिमा, जाहिराती आणि कारवाईचे दावे केले जातात. मात्र प्रत्यक्षात वीज चोरीची माहिती देण्यासाठी आलेल्या तक्रारदारालाच जर भेट नाकारली जात असेल, तर या मोहिमा केवळ कागदावरच आहेत का? असा सवाल उपस्थित होत आहे.
“बारामती तालुक्यात अनेक ठिकाणी उघडपणे वीज चोरी सुरू आहे. त्याबाबत माहिती देण्यासाठी मी स्वतः मुख्य अभियंत्यांची भेट घेण्यासाठी गेलो होतो. मात्र त्यांनी मला भेटण्यास नकार दिला,” असे संबंधित नागरिकाने सांगितले.
या घटनेमुळे महावितरण प्रशासनाची जबाबदारी, कार्यपद्धती आणि वीज चोरीबाबतची गंभीरता यावर मोठे प्रश्नचिन्ह निर्माण झाले आहे.
वीज चोरीवर कारवाई होणार की तक्रारदारांनाच दुर्लक्षित केले जाणार? असा थेट प्रश्न आता उपस्थित केला जात आहे.
या प्रकरणाबाबत महावितरणचे मुख्य अभियंता धर्मराज पेठकर यांची प्रतिक्रिया घेण्याचा प्रयत्न केला असता, त्यांच्याकडून कोणतीही अधिकृत प्रतिक्रिया मिळू शकलेली नाही.
✍🏻मुख्य संपादक – शशिकांत खरात
