बारामती | विशेष वृत्त
बारामती तालुक्यातील स्वस्त धान्याच्या शासकीय गोदामातून रात्री-अपरात्री धान्याने भरलेल्या गाड्या बाहेर पडत असल्याची चर्चा नागरिकांमध्ये जोर धरू लागली आहे. दिवसा शांत दिसणाऱ्या गोदामातून रात्रीच्या वेळी नेमकी कोणती वाहतूक होते? या वाहनांमधून कोणता माल नेला जातो? तो कुठे जातो? आणि या संपूर्ण व्यवहाराची अधिकृत नोंद कोणत्या कागदपत्रांमध्ये आहे? असे अनेक प्रश्न उपस्थित होत आहेत. विशेष म्हणजे, या कथित धान्य खरेदी-विक्रीच्या चर्चेत दोन अक्षरांचे एक वेगळेच कोडे रंगू लागले आहे. नावाचे पहिले अक्षर ‘अ’ आणि आडनावाचे पहिले अक्षर ‘म’! या दोन अक्षरांमागे नेमका कोणता संदर्भ दडला आहे? संबंधित व्यक्तीचा शासकीय गोदामातील धान्य व्यवहाराशी काय संबंध आहे? हा व्यवहार अधिकृत प्रक्रियेनुसार होतोय का? याबाबत नागरिकांमध्ये उत्सुकता निर्माण झाली आहे.
शासकीय धान्य हे सार्वजनिक वितरण व्यवस्थेचा महत्त्वाचा भाग आहे. त्यामुळे गोदामातून होणारी प्रत्येक आवक-जावक, वाहनांची नोंद, वजनकाटा पावत्या, स्टॉक रजिस्टर, वाहतूक आदेश आणि धान्य वितरणाचा तपशील पारदर्शक असणे अपेक्षित आहे.
आता प्रशासनासमोर काही थेट प्रश्न आहेत
1. बारामती तालुक्यातील शासकीय धान्य गोदामातून रात्रीच्या वेळी किती वाहनांची वाहतूक होते?
2. बाहेर जाणाऱ्या धान्याचा अधिकृत वाहतूक आदेश आणि नोंद उपलब्ध आहे का?
3. धान्य खरेदी करणारे अधिकृत व्यापारी किंवा लाभार्थी कोण आहेत?
4. गोदामातील साठा आणि प्रत्यक्ष वितरण यांचा ताळमेळ आहे का?
5. नागरिकांमध्ये चर्चेत असलेल्या ‘अ’ आणि ‘म’ या अक्षरांच्या कोड्याचा नेमका संदर्भ काय?
धान्याच्या पोत्यांचा हिशेब कागदावर आहे की चर्चांमध्येच? ‘अ’ आणि ‘म’ या दोन अक्षरांमधील गूढ उलगडणार तरी कोण?
आता केवळ चर्चांना पूर्णविराम न देता अन्न व नागरी पुरवठा विभागाने प्रत्यक्ष तपासणी करून वस्तुस्थिती जनतेसमोर मांडण्याची गरज आहे.
टीप : या वृत्तातील वाहतूक व व्यवहारासंबंधी बाबी नागरिकांमध्ये चर्चेत असलेल्या माहितीनुसार मांडल्या आहेत. त्यांची स्वतंत्र अधिकृत पुष्टी झालेली नाही. संबंधित व्यक्तींची बाजू आणि प्रशासनाचे स्पष्टीकरण घेणे आवश्यक आहे.

The post बारामतीच्या शासकीय धान्य गोदामात रात्रीच्या हालचालींची चर्चा! नेमका धान्याचा खेळ काय? ‘अ’ आणि ‘म’ या अक्षरांमागचे गूढ उलगडणार का? appeared first on HAQQNAMA DAILY NEWS.

The post बारामतीत चारा बियाण्यांचे मोफत वाटप; शेतकऱ्यांच्या पशुधनाला मिळणार आधार appeared first on HAQQNAMA DAILY NEWS.

बारामती | दिनांक ९ नोव्हेंबर २०२६

मे महिन्यात १०० इंजेक्शनच्या साठ्याप्रकरणी गुन्हा दाखल झालेला गौरव जाधव पुन्हा पोलिसांच्या जाळ्यात! यावेळी तीन साथीदारांसह ११० इंजेक्शनचा साठा जप्त!
पोलीस उपनिरीक्षक सर्जेराव पुजारी यांना मिळाली गोपनीय खबर, पोलिसांनी क्षणाचाही विलंब न करता टाकला छापा; चार संशयित ताब्यात, तब्बल २ लाख ३१ हजार ७८४ रुपयांचा मुद्देमाल जप्त!
एकाच आरोपीविरुद्ध सहा महिन्यांच्या आत दुसरा गुन्हा! दोन स्वतंत्र कारवायांत मिळून २१० इंजेक्शनच्या बाटल्या जप्त; बारामती शहर पोलिसांची उल्लेखनीय कामगिरी!
दिवाळीच्या सणासुदीची धामधूम, बाजारपेठांमध्ये नागरिकांची लगबग आणि सर्वत्र उत्सवाचे वातावरण असतानाच बारामती शहर पोलिसांनी नशेसाठी गैरवापर होऊ शकणाऱ्या औषधी इंजेक्शनच्या कथित अनधिकृत विक्रीविरुद्ध मोठी कारवाई केली आहे. शहरातील नागरिकांच्या सुरक्षिततेसाठी सतर्क असलेल्या पोलिसांना मिळालेल्या एका गोपनीय खबरीचे मोठ्या कारवाईत रूपांतर झाले असून, चार संशयित इसमांच्या कब्जातून MEPHENTERMINE SULPHATE INJECTION IP या औषधाच्या तब्बल ११० इंजेक्शनच्या बाटल्या जप्त करण्यात आल्या आहेत.विशेष म्हणजे, याच प्रकरणातील गौरव बाळासो जाधव याच्याविरुद्ध मे २०२६ मध्ये याच प्रकारच्या १०० इंजेक्शनच्या साठ्याप्रकरणी गुन्हा दाखल करण्यात आला होता. आता अवघ्या सहा महिन्यांच्या आत त्याच्याविरुद्ध पुन्हा तीन साथीदारांसह अशाच प्रकारच्या इंजेक्शनच्या साठ्याशी संबंधित गुन्हा दाखल झाल्याने पोलिसांनी या प्रकरणाची गंभीर दखल घेतली आहे.मे महिन्यात १०० इंजेक्शन, नोव्हेंबरमध्ये आणखी ११० इंजेक्शन! दोन कारवायांत मिळून २१० बाटल्यांचा साठा जप्त झाल्याने अनधिकृत औषध पुरवठ्याच्या संभाव्य साखळीचा शोध घेण्यावर पोलिसांनी लक्ष केंद्रित केले आहे. दिवाळीच्या काळात नागरिक सण साजरा करण्यात व्यस्त असताना बारामती शहर पोलीस मात्र कायदा व सुव्यवस्था राखण्याबरोबरच संशयास्पद हालचालींवर लक्ष ठेवून होते. दिनांक ०८ नोव्हेंबर २०२६ रोजी पोलीस उपनिरीक्षक श्री. सर्जेराव पुजारी यांना गोपनीय बातमीदारामार्फत माहिती मिळाली की, बारामती शहरातील इंदापूर रोडलगत, मार्केट यार्ड शेजारी, भारतरत्न डॉ. बाबासाहेब आंबेडकर विद्यार्थी वसतिगृहाच्या मैदानात, सचिन भेळ अँड वडापाव या टपरीच्या पाठीमागील आडोशाच्या जागेत चार इसम औषधी इंजेक्शनच्या बाटल्यांचा साठा घेऊन थांबले आहेत. सदर इंजेक्शनचा नशेसाठी गैरवापर होण्याची शक्यता असून, त्यांची अनधिकृत खरेदी-विक्री सुरू असल्याची खबर मिळाली.ही माहिती मिळताच पोलीस उपनिरीक्षक श्री. सर्जेराव पुजारी यांनी तात्काळ वरिष्ठ अधिकाऱ्यांना कळवून कारवाईची तयारी केली. प्रभारी पोलीस निरीक्षक श्री. श्रीशैल चिवडशेट्टी यांच्या नेतृत्वाखाली पोलीस उपनिरीक्षक सर्जेराव पुजारी, पोलीस शिपाई विजय गोपाळ ओमासे/५०४, पोलीस शिपाई कुणाल म्हस्के व पोलीस शिपाई गिरीश नेवसे यांच्या पथकाने घटनास्थळी धाव घेतली. पोलिसांनी मिळालेल्या माहितीची खातरजमा केली असता चार इसम औषधी इंजेक्शनच्या बाटल्यांची मोजणी व हिशोब करीत असल्याचे निदर्शनास आले. पोलीस पथकाने तत्काळ चारही इसमांना ताब्यात घेतले. पंचांच्या उपस्थितीत तपासणी केली असता त्यांच्या कब्जातून मोठ्या प्रमाणात औषधी इंजेक्शनचा साठा मिळून आला. पोलिसांनी केलेल्या कारवाईत गौरव बाळासो जाधव याच्या कब्जातून २५ बाटल्या, सनी दत्तात्रय गायकवाड याच्या कब्जातून २५ बाटल्या, विशाल अनिल माने याच्या कब्जातून २५ बाटल्या व प्रथमेश विश्वनाथ मोहरे याच्या कब्जातून ३५ बाटल्या अशा एकूण ११० मेफेन्टरमाईन इंजेक्शनच्या बाटल्या जप्त करण्यात आल्या. सदर औषध हे Schedule H वर्गातील असून, त्याच्या बॉक्सवर नोंदणीकृत वैद्यकीय व्यावसायिकाच्या प्रिस्क्रिप्शनशिवाय किरकोळ विक्री करू नये, असा वैधानिक इशारा आहे. संबंधित इसमांकडे औषध विक्रीचा वैध परवाना, खरेदी-विक्रीची बिले व प्रिस्क्रिप्शन याबाबत विचारणा केली असता त्यांनी त्या वेळी आवश्यक कागदपत्रे सादर केली नाहीत.
प्राथमिक चौकशीत प्रथमेश विश्वनाथ मोहरे याने सनी दत्तात्रय गायकवाड याच्याकडून २३ बाटल्या व विशाल अनिल माने याच्याकडून १२ बाटल्या अशा एकूण ३५ बाटल्या स्वतः सेवन करण्याच्या उद्देशाने खरेदी केल्याची माहिती प्राप्त झाली आहे. या माहितीची पडताळणी करून औषधाचा मूळ पुरवठादार, खरेदी-विक्रीचे व्यवहार व अन्य संबंधित व्यक्तींचा सहभाग यांचा तपास सुरू आहे.
या कारवाईतील सर्वात लक्षवेधी बाब म्हणजे गौरव जाधव याच्याविरुद्ध यापूर्वीही याच प्रकारच्या इंजेक्शनच्या साठ्याप्रकरणी गुन्हा दाखल आहे. दिनांक २३ मे २०२६ रोजी स्थानिक गुन्हे शाखा, पुणे ग्रामीण यांनी बारामती-भिगवण रोडवरील एमईएसबी कार्यालयाजवळील सर्व्हिस रोडवर केलेल्या कारवाईत गौरव बाळासो जाधव याच्या ताब्यातील काळ्या रंगाच्या ॲक्टिव्हा क्रमांक MH 42 AW 9260 या वाहनाच्या डिकीत MEPHENTERMINE SULPHATE INJECTION IP या औषधाच्या १०० सीलबंद बाटल्या, किंमत रुपये ३३,४४०/-, मिळून आल्या होत्या. त्या प्रकरणी स्थानिक गुन्हे शाखेचे पोलीस हवालदार अजय रमेश घुले, बक्कल क्रमांक २१८९, यांच्या फिर्यादीवरून बारामती शहर पोलीस स्टेशन येथे दिनांक २६ मे २०२६ रोजी गुन्हा रजिस्टर क्रमांक २०३/२०२६, भारतीय न्याय संहिता, २०२३ चे कलम १२३, १२५, २७८ सह औषधे व सौंदर्य प्रसाधने अधिनियम, १९४० चे कलम १८(c), १८(a)(vi), २७(d) व २८ अन्वये गुन्हा दाखल करण्यात आला होता.
आता दिनांक ०८ नोव्हेंबर २०२६ रोजी गौरव जाधव व त्याच्या तीन साथीदारांच्या कब्जातून पुन्हा ११० इंजेक्शनचा साठा जप्त करण्यात आल्याने, या दोन्ही प्रकरणांतील संभाव्य संबंध आणि औषध पुरवठ्याची साखळी शोधण्याच्या दृष्टीने तपासाला महत्त्व प्राप्त झाले आहे. एकाच प्रकारच्या औषधाच्या साठ्याशी संबंधित दोन स्वतंत्र गुन्हे, एकाच आरोपीचे नाव आणि सहा महिन्यांच्या कालावधीत २१० इंजेक्शनच्या बाटल्यांची जप्ती, ही बाब बारामती शहर पोलिसांच्या तपासातील विशेष मुद्दा ठरली आहे. या कारवाईत पोलिसांनी ११० औषधी इंजेक्शनच्या बाटल्या, किंमत रुपये ३६,७८४/-, KTM कंपनीची मोटारसायकल क्रमांक MH 12 RL 1316, किंमत रुपये १,५०,०००/-, Honda Shine कंपनीची मोटारसायकल क्रमांक MH 42 AZ 2448, किंमत रुपये २५,०००/- व चार मोबाईल फोन, किंमत रुपये २०,०००/- असा एकूण रुपये २,३१,७८४/- किमतीचा मुद्देमाल जप्त करण्यात आला आहे. या प्रकरणी १) गौरव बाळासो जाधव, वय २४ वर्षे, रा. गोचीडवाडी, आमराई, बारामती, २) सनी दत्तात्रय गायकवाड, वय २७ वर्षे, रा. प्रतिभानगर, बारामती, ३) विशाल अनिल माने, वय २२ वर्षे, रा. आमराई, बारामती व ४) प्रथमेश विश्वनाथ मोहरे, वय २४ वर्षे, रा. प्रगतीनगर, तांदुळवाडी, बारामती या चौघांविरुद्ध बारामती शहर पोलीस स्टेशन येथे गुन्हा रजिस्टर क्रमांक ५११/२०२६ दाखल करण्यात आला आहे.
पोलीस शिपाई विजय गोपाळ ओमासे, बक्कल क्रमांक ५०४, यांनी सरकारतर्फे दिलेल्या फिर्यादीवरून दिनांक ०८/११/२०२६ रोजी रात्री २१.०५ वाजता औषधे व सौंदर्य प्रसाधने अधिनियम, १९४० चे कलम १८(c) सह २८, औषधे नियम, १९४५ मधील लागू तरतुदी तसेच भारतीय न्याय संहिता, २०२३ चे कलम १२३, १२५ व २७८ अन्वये गुन्हा दाखल करण्यात आला आहे. सदर गुन्ह्यात जप्त इंजेक्शनचा मूळ पुरवठादार कोण, या औषधांचा साठा नेमका कोठून आणण्यात आला, कोणत्या माध्यमातून खरेदी-विक्रीचे व्यवहार झाले, यामध्ये आणखी कोणत्या व्यक्तींचा सहभाग आहे, तसेच मे महिन्यातील पूर्वीच्या गुन्ह्याशी या प्रकरणाचा काही संबंध आहे काय, या सर्व बाबींचा तपास करण्यात येत आहे. जप्त मोबाईल फोनमधील संभाव्य डिजिटल पुरावे व आर्थिक व्यवहारांचीही कायदेशीर प्रक्रियेनुसार पडताळणी करण्यात येणार आहे.बारामती शहर पोलिसांची ही कारवाई केवळ औषधी इंजेक्शनच्या साठ्याची जप्ती नसून, वैद्यकीय औषधांच्या संभाव्य गैरवापराला प्रतिबंध करण्याच्या दृष्टीने महत्त्वपूर्ण पाऊल आहे. ऐन सणासुदीच्या काळातही गोपनीय माहितीवर तत्परतेने कारवाई करून पोलीस पथकाने कर्तव्यदक्षता, सतर्कता आणि गुन्हे प्रतिबंधाबाबतची बांधिलकी दाखवून दिली आहे.

सदर कारवाई मा. पोलीस अधीक्षक, पुणे ग्रामीण, श्री. संदीप सिंह गिल्ल (भा.पो.से.), मा. अपर पोलीस अधीक्षक, बारामती विभाग, श्री. गणेश बिरादार, मा. उपविभागीय पोलीस अधिकारी, बारामती विभाग, श्री. चैतन्य वसंतराव कदम तसेच परिविक्षाधीन पोलीस उपअधीक्षक तथा प्रभारी अधिकारी, बारामती शहर पोलीस स्टेशन, श्रीमती मनीषा ओमासे यांच्या मार्गदर्शनाखाली आणि पोलीस निरीक्षक श्री. श्रीशैल चिवडशेट्टी यांच्या नेतृत्वाखाली करण्यात आली.
या कारवाईमध्ये पोलीस उपनिरीक्षक श्री. सर्जेराव पुजारी यांनी गोपनीय बातमी मिळाल्यानंतर तात्काळ पुढाकार घेऊन पथकासह छापा कारवाई केली. त्यांना पोलीस शिपाई विजय गोपाळ ओमासे/५०४, पोलीस शिपाई कुणाल म्हस्के व पोलीस शिपाई गिरीश नेवसे यांनी सहकार्य केले. गुन्ह्याचा पुढील तपास पोलीस उपनिरीक्षक श्री. सर्जेराव पुजारी करीत आहेत.
बारामती शहरामध्ये औषधी इंजेक्शनचा अनधिकृत साठा, पुरवठा किंवा विक्री होत असल्याची माहिती नागरिकांना मिळाल्यास त्यांनी तात्काळ बारामती शहर पोलीस स्टेशन किंवा पोलीस मदत क्रमांक ११२ वर संपर्क साधावा. माहिती देणाऱ्या नागरिकांची ओळख कायद्यानुसार आवश्यक त्या मर्यादेत गोपनीय ठेवण्यात येईल. दिवाळीच्या उत्साहात नागरिकांच्या सुरक्षिततेसाठी जागरूक राहणाऱ्या बारामती शहर पोलिसांनी गोपनीय बातमीच्या आधारे केलेल्या या कारवाईत चार संशयितांना ताब्यात घेऊन ११० इंजेक्शनचा दुसरा मोठा साठा जप्त करण्यात यश मिळविले आहे. नशेसाठी औषधांच्या संभाव्य गैरवापराला आळा घालण्यासाठी पोलीस प्रशासनाची ही कारवाई महत्त्वपूर्ण ठरली आहे.

The post ऐन दिवाळीत बारामती पोलिसांचा नशेच्या इंजेक्शनच्या कथित अवैध विक्रीवर जबरदस्त घणाघात! ११० इंजेक्शनचा दुसरा मोठा साठा जप्त! appeared first on HAQQNAMA DAILY NEWS.

बारामती शहर पोलिसांची धडाकेबाज कारवाई! धारदार कोयत्याने तरुणावर प्राणघातक हल्ला करून दहशत निर्माण केल्याच्या गुन्ह्यातील आरोपीस गोपनीय बातमीच्या आधारे सापळा रचून अटक!

पोलीस शिपाई सागर जामदार यांनी पळून जाणाऱ्या आरोपीचा पाठलाग करून शिताफीने घेतले ताब्यात; मा. न्यायालयाकडून दिनांक ०७ नोव्हेंबर २०२६ पर्यंत चार दिवसांची पोलीस कोठडी मंजूर!
बारामती शहरातील सार्वजनिक शांतता व कायदा-सुव्यवस्थेला आव्हान देणाऱ्या शस्त्रधारी हिंसक कृत्यांविरुद्ध बारामती शहर पोलिसांनी प्रभावी कारवाई केली आहे. एका तरुणास जबरदस्तीने चारचाकी वाहनात बसवून दुसऱ्या ठिकाणी नेणे, रिव्हॉल्वरसारख्या शस्त्राचा धाक दाखवून जिवे मारण्याची धमकी देणे, धारदार कोयते हवेत उंचावून फिरवत परिसरात दहशतीचे वातावरण निर्माण करणे आणि धारदार कोयत्याने जिवे मारण्याच्या उद्देशाने प्राणघातक हल्ला करणे, अशा गंभीर स्वरूपाच्या गुन्ह्यातील आरोपी जयेश बाळासाहेब माने यास बारामती शहर पोलिसांनी गोपनीय माहितीच्या आधारे सापळा रचून शिताफीने अटक केली आहे.
विशेष म्हणजे, सदर आरोपीविरुद्ध यापूर्वी बारामती शहर पोलीस स्टेशन येथे खुनाचा गुन्हा, तर बारामती तालुका पोलीस स्टेशन येथे शस्त्र अधिनियमांतर्गत गुन्हा दाखल असल्याची नोंद आहे. त्यानंतर आता पुन्हा धारदार कोयत्याने प्राणघातक हल्ला केल्याचा गुन्हा दाखल झाल्याने आरोपीविरुद्ध नोंद झालेल्या हिंसक कृत्यांच्या आरोपांचे गांभीर्य समोर आले आहे. दिनांक २५/१०/२०२६ रोजी सायंकाळी ०६.३० वाजण्याच्या सुमारास बारामती शहरातील जामदार रोड, ग्रीन सिटी परिसरातील अक्षदा गार्डनजवळ फिर्यादी सुमित संतोष सोनवणे, वय २१ वर्षे, रा. बारामती, यास आरोपी १) जयेश माने, २) सोमा यादव व ३) प्रतीक, पूर्ण नाव व पत्ता माहीत नाही, यांनी अडवून त्याच्या इच्छेविरुद्ध पांढऱ्या रंगाच्या स्विफ्ट चारचाकी वाहनात बसवून ग्रीन सिटी मैदान परिसरात नेल्याचे फिर्यादीत नमूद आहे. फिर्यादी हा आदेश कुचेकर व धना कांबळे यांच्यासोबत फिरत असल्याच्या कारणावरून आरोपींनी त्याच्याशी वाद घातला. त्यावेळी आरोपी जयेश माने याने फिर्यादीच्या डोक्याला काळ्या रंगाचे रिव्हॉल्वरसारखे दिसणारे शस्त्र लावून जिवे मारण्याची धमकी दिली. त्यानंतर जयेश माने व सोमा यादव यांनी त्यांच्या हातातील लाकडी मूठ असलेले धारदार कोयते हवेत उंचावून फिरवत मोठमोठ्याने जिवे मारण्याच्या धमक्या दिल्या. जयेश माने हा शिवीगाळी करीत, ओरडत असल्याचे फिर्यादीने नमूद केले आहे. आरोपींच्या या कृत्यामुळे परिसरात भीतीचे वातावरण निर्माण झाले व तेथे उपस्थित असलेले काही नागरिक घाबरून पळून गेले. त्यानंतर तिन्ही आरोपींनी फिर्यादीस लाथाबुक्क्यांनी मारहाण केली. जयेश माने याने फिर्यादीस जिवे मारण्याच्या उद्देशाने त्याच्या मान व छातीवर धारदार कोयत्याने वार करण्याचा प्रयत्न केला. फिर्यादीने स्वतःचा जीव वाचविण्यासाठी खाली पडलेल्या अवस्थेत दोन्ही पाय वर करून बचाव केला असता कोयत्याचा वार त्याच्या उजव्या पायाच्या गुडघ्यावर व गुडघ्याच्या खाली लागून जखम झाली व रक्तस्राव झाला. सदर जखमेवर बारामती येथील सिल्व्हर ज्युबिली हॉस्पिटलमध्ये उपचार करून सात टाके घालण्यात आले. तसेच इतर आरोपींनीही फिर्यादीस मारहाण केल्याचे तक्रारीत नमूद आहे. याप्रकरणी बारामती शहर पोलीस स्टेशन येथे गुन्हा रजिस्टर क्रमांक ४९९/२०२६, भारतीय न्याय संहिता, २०२३ चे कलम १०९(१), १४०(१), ११८(१), ३५१(३), ११५(२), १२६(२), ३(५), शस्त्र अधिनियम, १९५९ चे कलम ४, २५ व महाराष्ट्र पोलीस अधिनियम, १९५१ चे कलम ३७(१) अन्वये गुन्हा दाखल करण्यात आला आहे. सदर गंभीर गुन्ह्याचा तपास सुरू असताना दिनांक ०३/११/२०२६ रोजी सायंकाळी ०७.०० वाजण्याच्या सुमारास बारामती शहर पोलीस स्टेशनचे पोलीस शिपाई अक्षय सिताफ यांना विश्वसनीय गोपनीय बातमीदारामार्फत माहिती प्राप्त झाली की, गुन्ह्यातील आरोपी जयेश माने हा बारामती शहरातील खंडोबानगर परिसरातील काठियावाडी चहाच्या दुकानाजवळ येणार आहे. सदर माहिती पोलीस शिपाई अक्षय सिताफ यांनी तात्काळ प्रभारी पोलीस निरीक्षक यांच्या निदर्शनास आणून दिली. त्यानुसार पोलीस उपनिरीक्षक विजय हरी टेळकीकर, पोलीस हवालदार रामचंद्र शिंदे, पोलीस शिपाई सागर जामदार व पोलीस शिपाई अक्षय सिताफ यांच्या पथकाने संबंधित परिसरात गोपनीयरीत्या सापळा रचला. बातमीतील वर्णनाशी मिळताजुळता संशयित इसम सदर ठिकाणी आल्यानंतर पोलिसांना पाहून पळून जाण्याचा प्रयत्न करू लागला. त्यावेळी पोलीस शिपाई सागर जामदार यांनी तत्परतेने त्याचा पाठलाग करून सदर इसमास शिताफीने ताब्यात घेतले. ताब्यात घेतलेल्या इसमाची ओळख जयेश बाळासाहेब माने अशी पटवून त्याच्याकडे गुन्ह्याच्या अनुषंगाने प्राथमिक चौकशी करण्यात आली. उपलब्ध तपास सामग्री व कायदेशीर प्रक्रियेच्या आधारे आरोपी जयेश माने यास दिनांक ०३/११/२०२६ रोजी रात्री ११.०० वाजता अटक करण्यात आली.
अटक आरोपी जयेश बाळासाहेब माने याचे पूर्व गुन्हेगारी रेकॉर्ड तपासले असता त्याच्याविरुद्ध बारामती शहर पोलीस स्टेशन येथे गुन्हा रजिस्टर क्रमांक ६४६/२०२४, भारतीय न्याय संहिता, २०२३ चे कलम १०३(१), ६१(२), १८९(२), १८९(४), १९१(२), १९१(३), १९० अन्वये खुनाचा गुन्हा दाखल असल्याची माहिती प्राप्त झाली आहे.
सदर खुनाच्या गुन्ह्याच्या मूळ फिर्यादीनुसार, दिनांक २१/०८/२०२४ रोजी सायंकाळी ०५.०० वाजण्याच्या सुमारास मौजे जळोची येथील काळ्या ओढ्याच्या पुलाजवळ चारचाकी इनोव्हा वाहनातून आलेल्या १) जयेश बाळासाहेब माने, २) शुभम गायकवाड, ३) करण जाधव, ४) अविष गरुड, ५) सोमनाथ जाधव, ६) भोल्या व इतर आरोपींनी मागील वर्षी टी.सी. कॉलेज येथे गणेश धुळाबापू वाघमोडे याच्यासोबत झालेल्या जुन्या भांडणाच्या कारणावरून त्याच्या खुनाचा कट रचून त्याच्या डोक्यावर, मानेवर व शरीराच्या इतर भागांवर धारदार शस्त्राने वार करून त्यास जिवे ठार मारल्याचा आरोप आहे. सदर घटनेत गणेश धुळाबापू वाघमोडे, वय अवघे १७ वर्षे, रा. जळोची, ता. बारामती, जि. पुणे, याचा मृत्यू झाल्याबाबत त्याचे मामा तथा फिर्यादी नवनाथ उत्तम चोरमले यांनी तक्रार दिलेली आहे. सदर गुन्ह्यात जयेश माने याच्यासह इतर आरोपींविरुद्ध खुनाचा गंभीर आरोप नोंदविण्यात आला असून त्याची न्यायालयीन सद्यस्थिती स्वतंत्रपणे पडताळण्यात येत आहे. तसेच आरोपी जयेश बाळासाहेब माने याच्याविरुद्ध बारामती तालुका पोलीस स्टेशन येथे गुन्हा रजिस्टर क्रमांक ४११/२०२५, भारतीय न्याय संहिता, २०२३ चे कलम १८९(२), १८९(४), १९१(२), १९१(३), १९०, शस्त्र अधिनियम, १९५९ चे कलम ४, २५ व महाराष्ट्र पोलीस अधिनियम कलम १३५ अन्वये गुन्हा दाखल असल्याची नोंद आहे. अशा प्रकारे आरोपी जयेश माने याचे नाव सन २०२४ मधील खुनाच्या गुन्ह्यात, सन २०२५ मधील शस्त्र अधिनियमांतर्गत गुन्ह्यात आणि आता सन २०२६ मधील खुनाच्या प्रयत्नाच्या गुन्ह्यात समोर आले आहे. सदर गुन्ह्यांच्या नोंदींमधून आरोपीविरुद्ध हिंसक कृत्ये, धारदार शस्त्रांचा वापर आणि सार्वजनिक शांततेला बाधा निर्माण करणाऱ्या घटनांशी संबंधित गंभीर आरोप वारंवार झाल्याचे दिसून येत आहे. त्यामुळे आरोपीची पूर्व गुन्हेगारी पार्श्वभूमी, त्याच्या कथित गुन्ह्यांची पद्धत, सहआरोपींशी असलेले संबंध आणि कायदा व सुव्यवस्थेच्या दृष्टीने आवश्यक प्रतिबंधात्मक उपाययोजना यांचा सखोल तपास करण्यात येणार आहे. सदर अटक आरोपी जयेश माने यास मा. न्यायालयासमोर हजर करून पोलीस कोठडीची मागणी केली असता मा. न्यायालयाने त्यास दिनांक ०७/११/२०२६ पर्यंत चार दिवसांची पोलीस कोठडी मंजूर केली आहे. पोलीस कोठडीच्या कालावधीत गुन्ह्यात वापरलेले धारदार कोयते, रिव्हॉल्वरसारखे शस्त्र, स्विफ्ट चारचाकी वाहन यांचा शोध घेणे, गुन्ह्यातील इतर आरोपी सोमा यादव व प्रतीक यांचा ठावठिकाणा शोधणे, घटनास्थळावरील पुरावे संकलित करणे, सीसीटीव्ही फुटेज व इतर तांत्रिक पुराव्यांची पडताळणी करणे तसेच गुन्ह्यामागील कारण व आरोपींच्या स्वतंत्र भूमिकांचा तपास करणे याबाबत पुढील कार्यवाही करण्यात येणार आहे.
सार्वजनिक ठिकाणी धारदार शस्त्रे फिरवून नागरिकांना धमकावणे, दहशतीचे वातावरण निर्माण करणे, वैयक्तिक वादातून हिंसक हल्ले करणे आणि कायदा हातात घेण्याचे प्रकार कोणत्याही परिस्थितीत सहन केले जाणार नाहीत. अशा गुन्ह्यांमध्ये उपलब्ध पुराव्यांच्या आधारे कठोर, निष्पक्ष व कायदेशीर कारवाई करण्यात येईल. सामान्य नागरिकांच्या सुरक्षिततेला बाधा पोहोचविणाऱ्या कृत्यांविरुद्ध बारामती शहर पोलीस सतर्क असून सार्वजनिक शांतता, कायदा व सुव्यवस्था अबाधित राखण्यासाठी कटिबद्ध आहेत. नागरिकांनी कोणत्याही धमकीला किंवा दहशतीला बळी न पडता संशयास्पद हालचाली, बेकायदेशीर शस्त्र बाळगणे, शस्त्रांचा धाक दाखवून धमकावणे किंवा हिंसक कृत्यांबाबत तात्काळ नजीकच्या पोलीस स्टेशनला अथवा आपत्कालीन ११२ क्रमांकावर माहिती द्यावी. प्राप्त माहितीची कायद्यानुसार आवश्यक ती गोपनीयता राखण्यात येईल.

सदर कारवाई मा. पोलीस अधीक्षक, पुणे ग्रामीण, श्री. संदीप सिंह गिल्ल (भा.पो.से.), मा. अपर पोलीस अधीक्षक, बारामती विभाग, श्री. गणेश बिरादार, मा. उपविभागीय पोलीस अधिकारी, बारामती विभाग, श्री. चैतन्य वसंतराव कदम आणि परिविक्षाधीन पोलीस उपअधीक्षक तथा प्रभारी अधिकारी, बारामती शहर पोलीस स्टेशन, श्रीमती मनीषा ओमासे यांच्या मार्गदर्शनाखाली, पोलीस निरीक्षक श्रीशैल चिवडशेट्टी यांच्या नेतृत्वाखाली करण्यात आली.
सदर कारवाईमध्ये पोलीस उपनिरीक्षक विजय हरी टेळकीकर, पोलीस हवालदार रामचंद्र शिंदे, पोलीस शिपाई सागर जामदार व पोलीस शिपाई अक्षय सिताफ यांनी सहभाग घेतला. यामध्ये पोलीस शिपाई अक्षय सिताफ यांनी गोपनीय माहिती प्राप्त करून ती वरिष्ठ अधिकाऱ्यांपर्यंत पोहोचविण्यात महत्त्वाची भूमिका बजावली, तर पोलीस शिपाई सागर जामदार यांनी पळून जाणाऱ्या आरोपीचा तत्परतेने पाठलाग करून त्यास शिताफीने ताब्यात घेतले. सदर गुन्ह्याचा पुढील तपास पोलीस उपनिरीक्षक विजय हरी टेळकीकर, बारामती शहर पोलीस स्टेशन हे करीत आहेत.

The post खुनाच्या गुन्ह्यात यापूर्वी आरोपी असलेला, शस्त्र अधिनियमांतर्गत गुन्ह्याचीही नोंद असलेला जयेश माने पुन्हा खुनाच्या प्रयत्नाच्या गुन्ह्यात अटकेत! appeared first on HAQQNAMA DAILY NEWS.

संपादक / शशिकांत खरात

दिनांक : ०२ नोव्हेंबर २०२६
पूर्ववैमनस्यातून गंभीर हल्ल्याची तयारी असल्याची गोपनीय माहिती; चार धारदार कोयते व एक तलवार जप्त — अटक केलेल्या चार आरोपींविरुद्ध दरोडा, खुनाचा प्रयत्न, जबरी चोरी, खंडणी व मोक्कासारख्या गंभीर गुन्ह्यांची पूर्व नोंद!

बारामती, दि. ०२ नोव्हेंबर २०२६ : कुस्तीच्या तालमीत लाल मातीचा आखाडा असतो; मात्र बारामती शहरातील शिवाजीनगर, कसबा परिसरातील एका कुस्तीच्या तालमीमध्ये याच लाल मातीखाली लपवून ठेवलेला घातक शस्त्रसाठा बारामती शहर पोलिसांच्या सतर्कतेमुळे उघडकीस आला आहे. पूर्वी झालेल्या मारहाणीचा बदला घेण्यासाठी काही इसमांनी धारदार शस्त्रे गोळा करून गंभीर स्वरूपाचा हल्ला करण्याची तयारी केल्याची गोपनीय माहिती पोलिसांना मिळाली होती. या माहितीच्या आधारे राबविण्यात आलेल्या विशेष कोम्बिंग ऑपरेशनमध्ये चार धारदार लोखंडी कोयते व एक तलवार अशी एकूण पाच घातक शस्त्रे जप्त करण्यात आली. या प्रकरणात चार आरोपींना अटक करण्यात आली असून, मा. न्यायालयाने त्यांना दिनांक ०६ नोव्हेंबर २०२६ पर्यंत पाच दिवसांची पोलीस कोठडी मंजूर केली आहे. बारामती शहरातील खंडोबानगर, शिवाजीनगर, कसबा व परिसरात घडणाऱ्या मारामारी, धमकावणे, दहशत निर्माण करणे आणि बेकायदेशीर शस्त्रांच्या वापरासारख्या प्रकारांना प्रतिबंध करण्यासाठी बारामती शहर पोलिसांकडून विशेष मोहीम राबविण्यात येत आहे. याच मोहिमेदरम्यान दिनांक ३१ ऑक्टोबर २०२६ रोजी मा. उपविभागीय पोलीस अधिकारी, बारामती विभाग, श्री. चैतन्य वसंतराव कदम यांना विश्वासू गोपनीय बातमीदारामार्फत महत्त्वपूर्ण माहिती प्राप्त झाली. काही इसमांनी पूर्वीच्या वादातून कोणावर तरी हल्ला करण्याच्या उद्देशाने धारदार शस्त्रे गोळा केली असून, ती जामदार रोड, कसबा, बारामती येथील शिवाजीनगर गणेश मंदिराशेजारील कुस्तीच्या तालमीत लपवून ठेवली असल्याची माहिती होती. सदर माहितीचे गांभीर्य लक्षात घेऊन कोणताही अनुचित प्रकार घडण्यापूर्वी प्रतिबंधात्मक कारवाई करण्याच्या दृष्टीने तातडीने हालचाली सुरू करण्यात आल्या.
मा. वरिष्ठ पोलीस अधिकाऱ्यांच्या मार्गदर्शनाखाली पोलीस निरीक्षक श्री. श्रीशैल चिवडशेट्टी यांच्या नेतृत्वाखाली विशेष पोलीस पथक तयार करण्यात आले. पथकाने गोपनीय माहितीच्या आधारे संबंधित कुस्तीच्या तालमीमध्ये शोधमोहीम राबविली. यावेळी तालमीतील लाल मातीमध्ये लपवून ठेवलेले चार धारदार लोखंडी कोयते व एक तलवार अशी एकूण पाच शस्त्रे मिळून आली. पोलिसांनी पंचांच्या उपस्थितीत कायदेशीर पंचनामा करून सदर शस्त्रे जप्त केली. कुस्तीच्या सरावासाठी वापरल्या जाणाऱ्या तालमीमध्ये अशा प्रकारे घातक शस्त्रे लपवून ठेवण्यात आल्याचे उघड झाल्याने या शस्त्रांचा मूळ स्रोत, त्यांची साठवणूक आणि संभाव्य वापरामागील उद्देश याबाबत तपास सुरू करण्यात आला. सदर कारवाईच्या अनुषंगाने पाच संशयित इसमांची चौकशी सुरू करण्यात आली होती. याप्रकरणी पोलीस शिपाई श्री. गिरीश गणपत नेवसे, बक्कल क्रमांक ४७८, यांनी दिलेल्या सरकारतर्फे फिर्यादीवरून बारामती शहर पोलीस स्टेशन येथे गुन्हा रजिस्टर क्रमांक ४९८/२०२६, शस्त्र अधिनियम, १९५९ चे कलम ४ सह २५(१-ब)(ब) व महाराष्ट्र पोलीस अधिनियम, १९५१ चे कलम १२२(अ) अन्वये गुन्हा दाखल करण्यात आला आहे. या गुन्ह्यातील तपासादरम्यान उपलब्ध पुरावे, आरोपींच्या सहभागासंबंधी प्राप्त माहिती आणि अटकेची कायदेशीर आवश्यकता विचारात घेऊन चार आरोपींना अटक करण्यात आली आहे. अटक करण्यात आलेल्या आरोपींच्या पूर्व गुन्हेगारी अभिलेखांची माहिती प्राप्त केली असता त्यांच्याविरुद्ध यापूर्वी दरोडा, जबरी चोरी, खुनाचा प्रयत्न, खंडणी, अपहरण, मारहाण, धमकी तसेच महाराष्ट्र संघटित गुन्हेगारी नियंत्रण अधिनियमांतर्गत गंभीर स्वरूपाचे गुन्हे दाखल असल्याची नोंद आढळून आली आहे. अटक करण्यात आलेला पहिला आरोपी योगेश उर्फ धन्या गोकुळ कांबळे, रा. जामदार रोड, कसबा, बारामती याच्याविरुद्ध बारामती शहर पोलीस स्टेशन येथे गुन्हा रजिस्टर क्रमांक ८१६/२०१७, भा.दं.वि. कलम ३९५ अन्वये दरोड्याचा गुन्हा; गुन्हा रजिस्टर क्रमांक ५९/२०१८, भा.दं.वि. कलम ३९२, ३२३, ५०४, ५०६, ४११, ३४ अन्वये जबरी चोरी, मारहाण, शिवीगाळ व धमकीसंबंधी गुन्हा दाखल आहे. तसेच बारामती तालुका पोलीस स्टेशन येथे गुन्हा रजिस्टर क्रमांक ९४/२०१८, भा.दं.वि. कलम ३९४, ३४ अन्वये दुखापत करून जबरी चोरीचा गुन्हा आणि गुन्हा रजिस्टर क्रमांक ५०६/२०१८, भा.दं.वि. कलम ३९५ सह महाराष्ट्र संघटित गुन्हेगारी नियंत्रण अधिनियमाचे कलम ३(१)(ii), ३(४) अन्वये गुन्हा दाखल असल्याची नोंद आहे. अशा प्रकारे सदर आरोपीविरुद्ध चार पूर्व गुन्ह्यांची माहिती उपलब्ध आहे. दुसरा आरोपी आदेश संजय कुचेकर, रा. साठेनगर, कसबा, बारामती याच्याविरुद्ध वालचंदनगर पोलीस स्टेशन येथे गुन्हा रजिस्टर क्रमांक ४९०/२०२०, भा.दं.वि. कलम ३९५, ३९२, ३६३ अन्वये दरोडा, जबरी चोरी व अपहरणाचा गुन्हा दाखल आहे. बारामती शहर पोलीस स्टेशन येथे गुन्हा रजिस्टर क्रमांक १७७/२०२२, भा.दं.वि. कलम ३२४, ३४१, ३२३, ५०४, ५०६, ३४ अन्वये मारहाण, अडवणूक व धमकीचा गुन्हा; गुन्हा रजिस्टर क्रमांक ५२९/२०२२, भा.दं.वि. कलम ३०७, ३८४, १४३, १४७, १४८, १४९, ४५२, ४२७, ५०४, ५०६, १२०(ब), ३८७ सह शस्त्र अधिनियमाचे कलम ४, २५, फौजदारी कायदा सुधारणा अधिनियमाचे कलम ७ आणि महाराष्ट्र संघटित गुन्हेगारी नियंत्रण अधिनियमाचे कलम ३(१)(ii), ३(४) अन्वये गंभीर स्वरूपाचा गुन्हा दाखल आहे. याशिवाय बारामती शहर पोलीस स्टेशन येथे गुन्हा रजिस्टर क्रमांक २५२/२०२१, भा.दं.वि. कलम ३२४, ५०४, ५०६, ४२७ अन्वये गुन्हा दाखल असल्याची नोंद आहे. सदर आरोपीविरुद्ध एकूण चार पूर्व गुन्ह्यांची माहिती उपलब्ध असून, त्यामध्ये खुनाचा प्रयत्न, दरोडा, खंडणी, अपहरण आणि मोक्का कायद्यांतर्गत दाखल गुन्ह्यांचा समावेश आहे. तिसरा आरोपी ऋषिकेश उर्फ पप्पू अनिल चंदनशिवे, रा. साठेनगर, कसबा, बारामती याच्याविरुद्ध बारामती शहर पोलीस स्टेशन येथे दिनांक ०८ नोव्हेंबर २०२२ रोजी गुन्हा रजिस्टर क्रमांक ५२९/२०२२, भा.दं.वि. कलम ३०७, ३८४, १४३, १४४, १४७, १४८, १४९, ४२५, ४२७, ५०४, ५०६, ३४ सह शस्त्र अधिनियमाचे कलम ४, २५ आणि महाराष्ट्र संघटित गुन्हेगारी नियंत्रण अधिनियमांतर्गत गुन्हा दाखल असून, सदर प्रकरण न्यायप्रविष्ट आहे. तसेच गुन्हा रजिस्टर क्रमांक ४९०/२०२०, भा.दं.वि. कलम ३९५, ३९२, ३६३ अन्वये दरोडा, जबरी चोरी व अपहरणाशी संबंधित गुन्ह्याची नोंद असून, सदर प्रकरणदेखील न्यायप्रविष्ट असल्याची माहिती आहे. त्याच्याविरुद्ध दोन पूर्व गुन्ह्यांची माहिती उपलब्ध आहे. चौथा आरोपी अभिजीत प्रदीप शिंदे, रा. मळद, ता. बारामती, जि. पुणे याच्याविरुद्ध बारामती शहर पोलीस स्टेशन येथे गुन्हा रजिस्टर क्रमांक ५६७/२०१८, भा.दं.वि. कलम ३९५, ३२३, ५०४, ५०६ अन्वये दरोडा, मारहाण, शिवीगाळ व धमकीचा गुन्हा दाखल असल्याची नोंद आहे. अशा प्रकारे अटक करण्यात आलेल्या चार आरोपींविरुद्ध उपलब्ध माहितीनुसार एकूण ११ पूर्व गुन्ह्यांच्या नोंदी आहेत. यामध्ये दरोडा, जबरी चोरी, खुनाचा प्रयत्न, खंडणी, अपहरण, मारहाण, धमकी, शस्त्र अधिनियम आणि मोक्का कायद्यांतर्गत दाखल गुन्ह्यांचा समावेश आहे. या पूर्व गुन्ह्यांची माहिती ही गुन्हे दाखल झाल्याबाबतची असून, संबंधित प्रकरणांतील दोषसिद्धी अथवा न्यायालयीन निष्कर्ष स्वतंत्र अभिलेखांनुसार निश्चित होतात.अटक करण्यात आलेल्या चारही आरोपींना मा. न्यायालयासमोर हजर करून गुन्ह्याच्या पुढील तपासासाठी पोलीस कोठडी रिमांडची मागणी करण्यात आली. मा. न्यायालयाने सदर चार आरोपींना दिनांक ०६ नोव्हेंबर २०२६ पर्यंत पाच दिवसांची पोलीस कोठडी रिमांड मंजूर केली आहे. या पोलीस कोठडीदरम्यान जप्त करण्यात आलेले चार धारदार कोयते व तलवार नेमकी कोठून व कोणाकडून प्राप्त करण्यात आली, त्यांची वाहतूक कोणी केली, शस्त्रे तालमीतील लाल मातीखाली कोणी व कोणाच्या सांगण्यावरून लपवून ठेवली, शस्त्रांच्या खरेदीसाठी किंवा प्राप्तीसाठी आर्थिक मदत कोणी केली, पूर्वीच्या वादातून कोणावर हल्ला करण्याचा उद्देश होता काय, त्याबाबत काही पूर्वनियोजन करण्यात आले होते काय, तसेच या प्रकरणात आणखी कोणत्या व्यक्तींचा सहभाग आहे काय, या सर्व बाबींचा उपलब्ध पुरावे, साक्षीदारांचे जबाब, तांत्रिक माहिती व इतर कायदेशीर तपास साधनांच्या आधारे सखोल तपास करण्यात येत आहे. विशेष म्हणजे, कुस्तीच्या तालमीसारख्या ठिकाणी लाल मातीखाली धारदार शस्त्रे लपवून ठेवण्यात आल्याची माहिती मिळाल्यानंतर पोलिसांनी तत्परतेने कारवाई करून सदर शस्त्रसाठा उघडकीस आणला. प्राप्त गोपनीय माहितीनुसार संभाव्य गंभीर हल्ल्याचा धोका लक्षात घेऊन करण्यात आलेली ही कारवाई सार्वजनिक शांतता व नागरिकांच्या सुरक्षिततेच्या दृष्टीने महत्त्वपूर्ण ठरली आहे. तथापि, संभाव्य हल्ल्याचे नियोजन व त्यामधील प्रत्येक आरोपीचा सहभाग या बाबी अद्याप तपासाधीन आहेत. सदर कारवाई मा. पोलीस अधीक्षक, पुणे ग्रामीण, श्री. संदीप सिंह गिल्ल (भा.पो.से.), मा. अपर पोलीस अधीक्षक, बारामती विभाग, श्री. गणेश बिरादार, मा. उपविभागीय पोलीस अधिकारी, बारामती विभाग, श्री. चैतन्य वसंतराव कदम तसेच बारामती शहर पोलीस स्टेशनच्या प्रभारी परिविक्षाधीन पोलीस उपअधीक्षक श्रीमती मनीषा ओमासे यांच्या मार्गदर्शनाखाली पोलीस निरीक्षक श्री. श्रीशैल चिवडशेट्टी यांच्या नेतृत्वाखाली करण्यात आली. या कारवाईमध्ये पोलीस उपनिरीक्षक श्री. टेळकीकर, पोलीस हवालदार श्री. रामचंद्र शिंदे, पोलीस हवालदार श्री. अभिजीत एकशिंगे, पोलीस शिपाई श्री. गिरीश गणपत नेवसे, पोलीस शिपाई श्री. सादिक काझी व पोलीस शिपाई श्री. अक्षय सिताफ यांनी सहभाग घेतला. गुन्हा नोंदणीची कार्यवाही पोलीस हवालदार श्री. बनसोडे, बक्कल क्रमांक १९३५, यांनी केली असून, गुन्ह्याचा पुढील तपास पोलीस उपनिरीक्षक श्री. सर्जेराव पुजारी करीत आहेत. बारामती शहर व परिसरात बेकायदेशीर शस्त्रसाठा करणे, शस्त्रे बाळगून दहशत निर्माण करणे, मारामारी, धमकावणे, खंडणीसाठी दबाव आणणे किंवा गंभीर स्वरूपाचा अपराध करण्याच्या उद्देशाने शस्त्रे गोळा करणे अशा प्रकारांविरुद्ध बारामती शहर पोलिसांकडून विशेष कोम्बिंग ऑपरेशन, गोपनीय माहिती संकलन, संशयास्पद हालचालींची पडताळणी आणि कायद्यानुसार प्रतिबंधात्मक व दंडात्मक कारवाई सातत्याने सुरू आहे. बारामती शहर पोलिसांनी नागरिकांना आवाहन केले आहे की, आपल्या परिसरात कोणतीही व्यक्ती किंवा टोळके बेकायदेशीर कोयते, तलवारी, पिस्तूल अथवा अन्य घातक शस्त्रे बाळगत असल्यास, शस्त्रसाठा लपवून ठेवत असल्यास किंवा गंभीर स्वरूपाचा गुन्हा घडविण्याची तयारी सुरू असल्याची विश्वासार्ह माहिती मिळाल्यास ती तात्काळ बारामती शहर पोलीस स्टेशनला कळवावी. माहिती देणाऱ्या नागरिकांची ओळख कायदेशीर तरतुदींच्या अधीन राहून गोपनीय ठेवण्यासाठी आवश्यक दक्षता घेतली जाईल. नागरिकांनी संशयित व्यक्तींना स्वतः सामोरे न जाता पोलिसांची मदत घ्यावी. आपत्कालीन परिस्थितीत ११२ या क्रमांकावर संपर्क साधावा. कुस्तीच्या तालमीतील लाल मातीखाली दडविलेला शस्त्रसाठा उघडकीस आणणारी ही कारवाई म्हणजे बेकायदेशीर शस्त्रसाठा व गंभीर गुन्ह्यांच्या संभाव्य तयारीविरुद्ध बारामती शहर पोलिसांकडून सुरू असलेल्या विशेष मोहिमेतील महत्त्वाची कारवाई असून, कायदा व सुव्यवस्था अबाधित राखण्यासाठी अशा कारवाया यापुढेही सातत्याने सुरू राहणार आहेत.

The post कुस्तीच्या तालमीतील लाल मातीखाली दडलेला घातक शस्त्रसाठा बारामती शहर पोलिसांनी केला उघड; चार आरोपींना पाच दिवसांची पोलीस कोठडी! appeared first on HAQQNAMA DAILY NEWS.

गोखले इन्स्टिट्यूटमधून एम.ए. इकॉनॉमिक्स पूर्ण; शिक्षण, आंतरराष्ट्रीय वित्तीय क्षेत्रातील अनुभव आणि स्वतःच्या कंपनीच्या माध्यमातून घडवला वेगळा प्रवास

बारामती / : प्रतिनिधी
बारामतीच्या शैक्षणिक आणि उद्योजकीय क्षेत्रासाठी अभिमानाची बाब म्हणून सूर्यतेज सागर देशखैरे यांनी पुण्यातील प्रतिष्ठित गोखले इन्स्टिट्यूट ऑफ पॉलिटिक्स अँड इकॉनॉमिक्स येथून अर्थशास्त्रातील पदव्युत्तर शिक्षण (एम.ए. इकॉनॉमिक्स) यशस्वीरीत्या पूर्ण केले आहे. त्यांनी  पदव्युत्तर पदवी संपादन केली आहे. शिक्षणासोबतच वित्तीय सेवा, कॅपिटल मार्केट, म्युच्युअल फंड आणि गुंतवणूकविषयक अभ्यासाचा अनुभव घेत त्यांनी वयाच्या अवघ्या २४व्या वर्षी स्वतःच्या वित्तीय सेवा व्यवसायाची मुहूर्तमेढ रोवली आहे. सूर्यतेज यांचा हा प्रवास केवळ पदवी मिळविण्यापुरता मर्यादित नसून, अर्थशास्त्राचे ज्ञान, कॉर्पोरेट क्षेत्रातील कामाचा अनुभव आणि उद्योजकतेची धडपड यांचा संगम म्हणून पाहिला जात आहे.
बारामतीपासून पुण्याच्या नामांकित संस्थांपर्यंतचा शैक्षणिक प्रवास
सूर्यतेज यांनी आपल्या शालेय शिक्षणाची सुरुवात बारामती येथील विद्या प्रतिष्ठानच्या न्यू बाल विकास मंदिर, सीबीएसई बोर्ड येथून केली. त्यानंतर त्यांनी पुण्यातील सिंबायोसिस कॉलेज ऑफ आर्ट्स अँड कॉमर्स, एस. बी. रोड येथून बी.ए. इकॉनॉमिक्स (ऑनर्स) ही पदवी पूर्ण केली.
अर्थशास्त्रातील उच्च शिक्षणासाठी त्यांनी गोखले इन्स्टिट्यूट ऑफ पॉलिटिक्स अँड इकॉनॉमिक्स, पुणे या नामांकित संस्थेची निवड केली. येथे त्यांनी सूक्ष्म अर्थशास्त्र, स्थूल अर्थशास्त्र, अर्थमिती, वित्तीय बाजारपेठ, आंतरराष्ट्रीय अर्थशास्त्र, सार्वजनिक अर्थशास्त्र, आर्थिक विकास, संशोधन पद्धती आणि वित्तीय व्यवस्थेशी संबंधित विविध विषयांचा अभ्यास केला.
या शिक्षणामुळे अर्थव्यवस्था, वित्तीय बाजारपेठ, गुंतवणूक आणि आर्थिक धोरणे यांविषयीचे त्यांचे शैक्षणिक आकलन अधिक व्यापक झाले आहे. शिक्षणासोबतच कॅपिटल मार्केटचा विशेष अभ्यास
पारंपरिक शैक्षणिक अभ्यासाबरोबरच सूर्यतेज यांनी वित्तीय बाजारपेठेतील कौशल्ये विकसित करण्यावर भर दिला. त्यांनी इन्व्हेस्टमेंट बँकिंग अँड हेज फंड ऑपरेशन्स या विषयातील एक्झिक्युटिव्ह प्रोग्राम, ऑप्शन सेलिंगचे प्रशिक्षण तसेच कॅपिटल मार्केटशी संबंधित अभ्यासक्रम पूर्ण केले आहेत. याशिवाय, त्यांनी NISM म्युच्युअल फंड डिस्ट्रीब्यूटर प्रमाणपत्र प्राप्त केले असून, स्वतःच्या नावाने ARN नोंदणीही मिळवली आहे. त्यांनी गुंतवणूकविषयक अतिरिक्त प्रमाणपत्र अभ्यासक्रमही पूर्ण केल्याची माहिती त्यांच्या कुटुंबीयांनी दिली.कॉर्पोरेट क्षेत्रातील अनुभवातून उद्योजकतेकडे सूर्यतेज यांची सिंबायोसिस कॉलेजमधील कॅम्पस प्लेसमेंट प्रक्रियेद्वारे Northern Trust या वित्तीय सेवा क्षेत्रातील कंपनीत निवड झाली. तेथे त्यांनी फायनान्शियल अॅनालिसिस आणि अकाउंटिंगशी संबंधित कामाचा अनुभव घेतला. त्यानंतर त्यांनी म्युच्युअल फंड क्षेत्रात इन्व्हेस्टमेंट ऑपरेशन्स आणि संशोधनाशी संबंधित काम केले. या अनुभवातून त्यांना वित्तीय व्यवहार, गुंतवणूक प्रक्रिया आणि म्युच्युअल फंड उद्योगाच्या कामकाजाची व्यावहारिक ओळख मिळाली. कॉर्पोरेट क्षेत्रातील अनुभवाचा उपयोग स्वतःचा व्यवसाय उभारण्यासाठी करण्याचा निर्णय घेत त्यांनी Imperial Global Financial Services LLP या वित्तीय सेवा संस्थेची स्थापना केली. मुंबईतील नरिमन पॉइंट येथील रहेजा चेंबर्समधून त्यांनी आपल्या व्यवसायाला सुरुवात केली. वित्तीय सेवा क्षेत्रातील ज्ञान, गुंतवणूकदारांना आर्थिक बाबी समजावून सांगण्याची भूमिका आणि व्यावसायिक कौशल्यांच्या आधारे स्वतःची ओळख निर्माण करण्याचा त्यांचा प्रयत्न आहे.
तरुण वयात स्वतःची ओळख निर्माण करण्याचा प्रयत्न आजच्या स्पर्धात्मक युगात उच्च शिक्षणासोबत प्रत्यक्ष कौशल्ये आणि व्यावसायिक अनुभव यांना विशेष महत्त्व प्राप्त झाले आहे. सूर्यतेज देशखैरे यांनी अर्थशास्त्रातील पदव्युत्तर शिक्षण पूर्ण करताना वित्तीय क्षेत्रातील अनुभव आणि उद्योजकतेचा मार्ग स्वीकारला आहे.
बारामतीसारख्या शहरातून शालेय शिक्षण घेऊन पुण्यात उच्च शिक्षण, कॉर्पोरेट क्षेत्रातील कामाचा अनुभव आणि त्यानंतर मुंबईत स्वतःचा वित्तीय सेवा व्यवसाय सुरू करण्यापर्यंतचा त्यांचा प्रवास तरुणांसाठी प्रेरणादायी ठरू शकतो. अर्थशास्त्र, गुंतवणूक, वित्तीय बाजारपेठ आणि आर्थिक साक्षरता या क्षेत्रांमध्ये भविष्यात अधिक व्यापक काम करण्याचे ध्येय त्यांच्या या प्रवासातून दिसून येते. सूर्यतेज सागर देशखैरे यांच्या या शैक्षणिक यशाबद्दल आणि पुढील व्यावसायिक वाटचालीसाठी त्यांचे सर्व स्तरांतून अभिनंदन होत आहे.

— समाप्त —

The post बारामतीच्या सूर्यतेज देशखैरे यांची अर्थशास्त्रात पदव्युत्तर झेप; वयाच्या २४ व्या वर्षी बनले अर्थतज्ञ  मुंबईत वित्तीय सेवा क्षेत्रात उद्योजकीय भरारी! appeared first on HAQQNAMA DAILY NEWS.

फलटण रोडवरील मुल्ला वस्ती परिसरातील प्रकार; खाद्यपदार्थांच्या स्वच्छतेवर प्रश्नचिन्ह!

बारामती : अरे बाबा, भंगार दुकानात भंगार ठेवायचं की खाण्याचे पदार्थ बनवायचे? बारामतीच्या फलटण रोडवरील मुल्ला वस्ती परिसरात खाद्यपदार्थ तयार करणारी बेकरी चक्क भंगार दुकानात चालवली जात असल्याचा प्रकार समोर आला आहे. ज्या ठिकाणी खाण्याचे पदार्थ तयार होतात, तिथं स्वच्छता असायला नको का? असा सवाल आता उपस्थित होत आहे.भंगाराच्या दुकानात बेकरी, स्वच्छतेचं काय?
खाद्यपदार्थ तयार करण्याच्या ठिकाणी स्वच्छता आणि आरोग्याचे नियम पाळले जातात का, याची तपासणी होणे गरजेचे आहे. परिसरातील स्वच्छतेबाबतही प्रश्न उपस्थित होत असून, संबंधित बेकरीची अन्न व औषध प्रशासनाने प्रत्यक्ष पाहणी करून वस्तुस्थिती तपासावी, अशी मागणी होऊ शकते.अधिकारी आता तरी जागे होणार का? सामान्य माणसाच्या पोटात जाणाऱ्या खाद्यपदार्थांच्या बाबतीत हलगर्जीपणा चालणार नाही. त्यामुळे संबंधित बेकरीकडे आवश्यक परवाने आहेत का, स्वच्छतेचे नियम पाळले जातात का आणि खाद्यपदार्थ तयार करण्यासाठी जागा योग्य आहे का, याची चौकशी होणे आवश्यक आहे.
आता प्रश्न एकच — भंगार दुकानात बेकरी चालत असेल, तर नागरिकांच्या आरोग्याची जबाबदारी कोण घेणार?

The post भंगाराच्या दुकानात बेकरीचा धंदा! फलटण रोडवरील मुल्ला वस्तीत अस्वच्छतेचा कळस; जनतेच्या आरोग्याशी खेळ? appeared first on HAQQNAMA DAILY NEWS.

संपादक | शशिकांत खरात
बारामती नगर परिषदेच्या मालकीच्या खुल्या जागा, जमिनी आणि इतर स्थावर मालमत्तांची ठिकाणनिहाय व क्षेत्रफळासह परिपूर्ण माहिती एकत्रित स्वरूपात कार्यालयाच्या अभिलेखावर उपलब्ध नसल्याचे नगर परिषदेने दिलेल्या पत्रातून समोर आले आहे. त्यामुळे नगर परिषदेच्या मालमत्ता नोंदींबाबत गंभीर प्रश्न उपस्थित होत आहेत. बारामती नगर परिषदेने दिनांक २५ ऑगस्ट २०२६ रोजी दिलेल्या पत्रात, नगरपालिकेच्या मालकीच्या सर्व खुल्या जागा, जमिनी व इतर स्थावर मालमत्तांची ठिकाणनिहाय आणि क्षेत्रफळासह परिपूर्ण माहिती एकीकृत स्वरूपात कार्यालयाच्या अभिलेखावर उपलब्ध नसल्याचे नमूद केले होते. नगर परिषदेच्या मालकीच्या सार्वजनिक मालमत्तांची अचूक नोंद, त्यांचे क्षेत्रफळ, ठिकाण आणि सद्यस्थिती यांची माहिती प्रशासनाकडे एकत्रित स्वरूपात उपलब्ध नसल्यास मालमत्तांच्या संरक्षणावर व व्यवस्थापनावर प्रश्नचिन्ह निर्माण होऊ शकते. नगर परिषदेच्या मालकीच्या जागांची संपूर्ण यादी तयार आहे का? या मालमत्तांची अद्ययावत नोंद ठेवली जाते का? आणि नागरिकांना या मालमत्तांची माहिती सहज उपलब्ध करून दिली जाते का? असे महत्त्वाचे प्रश्न या पत्राच्या अनुषंगाने उपस्थित होत आहेत. या प्रकरणात नगर परिषदेने सध्या सर्व मालमत्तांची माहिती संकलित केली आहे का, तसेच २०२६ नंतर अभिलेख अद्ययावत करण्यासाठी कोणती कार्यवाही केली, याबाबत प्रशासनाची अधिकृत भूमिका समोर येणे आवश्यक आहे.
सार्वजनिक मालमत्ता ही जनतेची संपत्ती आहे. तिच्या नोंदींबाबत पारदर्शकता आणि उत्तरदायित्व असणे गरजेचे आहे.

टीप : ही बातमी नगर परिषदेच्या २५ ऑगस्ट २०१६ रोजीच्या पत्रातील नमूद मजकुरावर आधारित आहे. सध्याची अभिलेखस्थिती आणि प्रशासनाची बाजू स्वतंत्रपणे पडताळणे आवश्यक आहे.

The post बारामती नगर परिषदेच्या मालकीच्या खुल्या जागांचा हिशोबच अभिलेखावर नाही? प्रशासनाच्या पत्राने उपस्थित केले गंभीर प्रश्न! appeared first on HAQQNAMA DAILY NEWS.

बारामती / संपादक शशिकांत खरात

आरोपी जहीर सिराज शेख वय 47 वर्ष पद वनपाल (वर्ग 3) करंजे राऊंड ऑफिसर वनपरिक्षेत्र अधिकारी यांना आज दिनांक 25 ऑक्टोबर 2026 रोजी अटक करण्यात आली असून पुढील सविस्तर माहिती अशी की तक्रारदार यांनी दिनांक 14 /10 /2026 रोजी तक्रार दिली की तक्रारदार यांची कोऱ्हाळे खुर्द येथे 4 हेक्टर शेत जमीन असून सदर शेतातील माती पावसामुळे निरा नदीत वाहून गेली होती म्हणून ते नदीपात्रातील माती शेतात टाकत असताना लोकसेवक जहीर शेख यांनी दिनांक 26/09/2026 रोजी तक्रारदारांचे काम बंद करून सदरची जागा फॉरेस्टच्या मालकीची असल्याचे सांगितले व तक्रारदार यांचे वर कारवाई करण्याची भीती घालून माती भराव करण्यास मज्जाव केला होता. सदर वेळी तक्रारदार यांनी लोकसेवकांना कारवाई न करता काम बंद न पाडण्यासाठी विनंती केली असता लोकसेवक जाहीर शेख यांनी कारवाई न करता काम सुरू ठेवण्याकरिता त्यांच्या सहकारी भुमरे मॅडम व स्वतःसाठी 10,000/- रुपये लाचेची मागणी करून 4000/-  हजार रुपये त्याच दिवशी स्वीकारले होते व उर्वरित 6000/- रुपये दिल्याशिवाय काम सुरू करू नका असे बोलून उर्वरित 6000/- रुपये लाचेची मागणी तक्रारदार यांच्याकडे केली होती. तक्रारदारांच्या प्राप्त तक्रारीच्या अनुषंगाने दिनांक 25/10/2026 रोजी केलेल्या लाच मागणी पडताळणी कारवाईदरम्यान आरोपी जहीर शेख वनपाल यांनी तक्रारदार यांचेकडे पंचासमक्ष 10,000/- रुपये लाचे बाबत बोलणी करून यापूर्वी 4000/- रुपये स्वीकारल्याचे मान्य करून उर्वरित 6000/- रुपये पंचा समक्ष स्वीकारली असता 14.17 वाजता रंगेहात ताब्यात घेण्यात आले आहे. याप्रकरणी भ्रष्टाचार प्रतिबंधक कायदा 1988 चे कलम 7 प्रमाणे माळेगाव पोलीस स्टेशन पुणे ग्रामीण येथे गुन्हा दाखल करण्यात आला आहे. ही कारवाई पुढील अधिकाऱ्यांमार्फत करण्यात आली आहे. सापळा अधिकारी :- श्री संतोष पाटील पोलीस निरीक्षक लाचलुचपत प्रतिबंधक विभाग पुणे , पर्यवेक्षण अधिकारी :- श्री सतीश वाळके पोलीस उपअधीक्षक लाचलुचपत प्रतिबंधक विभाग पुणे, सापळा पथक 1) पोलीस कॉन्स्टेबल /1966 प्रवीण तावरे, 2) मपोशि / 7934 वैशाली माकर, 3) श्रेणी पो उपनिरीक्षक श्री अविनाश चव्हाण. लाचलुचपत प्रतिबंधक विभाग पुणे, मार्गदर्शक :- 1) श्री. शिरीष सरदेशपांडे पोलीस अधीक्षक लाचलुचपत प्रतिबंधक विभाग पुणे, 2) श्री. अजित पाटील अप्पर पोलीस अधीक्षक लाचलुचपत प्रतिबंधक विभाग पुणे ,

The post वनपाल जहीर सिराज शेख याला 6000 रुपयांची लाच स्वीकारताना लाच लुचपत प्रतिबंधक विभागाने रंगेहात पकडले..! appeared first on HAQQNAMA DAILY NEWS.

सामाजिक कार्यकर्ते फिरोज मुन्ना तांबोळी यांनी 21 ऑक्टोबर 2026 रोजी लेखी अर्जाद्वारे मुख्याधिकारी पंकज भुसे यांना नवरंग भोरीचाळ आमराई बारामती येथील जीर्ण अवस्थेत असलेली झाडे तात्काळ काढण्यात यावी अशी मागणी केली होती परंतु त्या तक्रारींकडे दुर्लक्ष केले आज ते झाड अचानक कोसळून पडले तिथे लहान मुले खेळत होती अशी माहिती समोर आली आहे. जर बारामती मधील नागरिकांच्या जीवितास कोणताही धोका झाला असता तर जबाबदार कोण…? असा सवाल समस्त बारामतीकर करत आहेत.

The post बारामती नगरपालिकेचा जीवघेणा कारभार नागरिकांच्या जीवाशी खेळ सुरू..? मुख्याधिकारी पंकज भुसे करीत आहेत तक्रारींकडे दुर्लक्ष..! appeared first on HAQQNAMA DAILY NEWS.