बारामती/ संपादक शशिकांत खरात
बारामती शहर व तालुक्यात राज्यात गुटखा बंदी लागू असतानाही अनेक टपऱ्या, पानटपऱ्या व किराणा दुकानांवर खुलेआम गुटखा विक्री होत असल्याचे चित्र दिसत आहे. महाराष्ट्र शासनाने गुटखा विक्रीवर बंदी घातली असतानाही शहरातील अनेक भागात टपऱ्यांवर सहज उपलब्ध होत असल्यामुळे प्रशासनाच्या कामकाजावर प्रश्नचिन्ह उपस्थित होत आहे.स्थानिक नागरिकांच्या मते, जवळपास प्रत्येक टपरीवर गुटखा मिळत असून हा माल नेमका कोण पुरवतो, हा मोठा प्रश्न निर्माण झाला आहे. एवढ्या मोठ्या प्रमाणावर गुटखा विक्री सुरू असताना पोलिस प्रशासन व अन्न व औषध प्रशासन (FDA) यांना याची माहिती नाही का, असा सवालही उपस्थित केला जात आहे.महाराष्ट्र शासनाने अन्न सुरक्षा व मानके अधिनियम 2006 (Food Safety and Standards Act, 2006) अंतर्गत गुटखा यामध्ये तंबाखूचे मिश्रण असल्यामुळे त्यावर बंदी घातली आहे. या कायद्यानुसार अशा प्रकारची विक्री, साठा किंवा वितरण करणे हा दंडनीय गुन्हा आहे.
संबंधित कायदेशीर कलमे
अन्न सुरक्षा व मानके अधिनियम 2006 चे कलम 26 व 27 – असुरक्षित अन्नपदार्थाचे उत्पादन, साठवणूक व विक्री करणे गुन्हा आहे.कलम 59 – मानवी आरोग्यास हानिकारक अन्न विक्री केल्यास दंड व तुरुंगवासाची तरतूद.महाराष्ट्र शासनाचा गुटखा बंदी आदेश (2012 पासून दरवर्षी नूतनीकरण) – गुटखा व सुगंधित तंबाखू विक्री, साठा व वितरण पूर्णपणे बंद.तरीही बारामतीत उघडपणे गुटखा विक्री सुरू असल्याने अन्न व औषध प्रशासन विभाग, पोलिस प्रशासन व स्थानिक स्वराज्य संस्थांनी संयुक्त कारवाई करून गुटखा पुरवठ्याचा स्रोत शोधणे आवश्यक असल्याची मागणी नागरिकांकडून होत आहे.जर प्रशासनाने या प्रकरणाकडे दुर्लक्ष केले, तर तरुण पिढीच्या आरोग्यावर गंभीर परिणाम होण्याची भीती व्यक्त केली जात आहे. त्यामुळे संबंधित विभागांनी तात्काळ तपास करून गुटखा पुरवठा साखळी उघड करावी व दोषींवर कठोर कारवाई करावी, अशी मागणी नागरिकांकडून होत आहे.
✍🏻मुख्य संपादक – शशिकांत खरात
