बारामती :
बारामती येथील सुप्रसिद्ध डॉक्टर दिलीप लोंढे यांचे चिरंजीव डॉ. निखिल दिलीप लोंढे यांचे बारामती स.नं. २६६ येथे सुरू असलेल्या हॉस्पिटलच्या नवीन बांधकामाला बोगस व अवैध मोजणी नकाशाच्या आधारे मंजुरी देण्यात आल्याचे चौकशीत सिद्ध झाले आहे.
या प्रकरणी सामाजिक कार्यकर्ते सोहेल शेख यांनी दिनांक १४ मे २०२५ रोजी बारामती नगर परिषदेचे मुख्याधिकारी यांच्याकडे तक्रार अर्ज दाखल केला होता. त्या तक्रारीच्या अनुषंगाने मुख्याधिकारी, बारामती नगर परिषद तसेच सहाय्यक नगर रचनाकार श्री. गीते यांच्या मार्फत चौकशी व सुनावणी करण्यात आली.
चौकशीदरम्यान उपाधीक्षक भूमी अभिलेख कार्यालयाच्या खुलासा पत्रात गंभीर बाब समोर आली. डॉ. निखिल लोंढे यांनी हॉस्पिटल बांधकाम परवानगीसाठी सादर केलेला मोजणी नकाशा भूमी अभिलेख कार्यालयाच्या अधिकृत नोंदीत अस्तित्वातच नसल्याचे स्पष्ट झाले. तसेच त्या क्रमांकाने कोणत्याही प्रकारची मोजणी झालेली नसल्याचेही उघड झाले.
यामुळे बोगस शिक्के वापरून बनावट मोजणी नकाशा तयार करून बांधकाम परवानगी घेण्यात आल्याचे सिद्ध झाले आहे.
सामाजिक कार्यकर्ते सोहेल शेख यांची तक्रार खरी ठरली असून, या प्रकरणात डॉ. निखिल लोंढे यांनी बोगस मोजणी नकाशाच्या आधारे बांधकाम परवानगी घेतल्याचे स्पष्ट झाले आहे. या पार्श्वभूमीवर मुख्याधिकारी यांनी उपाधीक्षक भूमी अभिलेख यांना संबंधितांवर कार्यवाही करण्याचे आदेश दिले आहेत.
मात्र, या संपूर्ण प्रकरणात नगर परिषदेच्या भूमिकेवर गंभीर प्रश्नचिन्ह उपस्थित झाले आहे.
सोहेल शेख यांनी आक्षेप नोंदवत विचारणा केली आहे की,
“जेव्हा मूळ बांधकाम परवानगीच बोगस मोजणी नकाशावर दिली गेली असल्याचे सिद्ध झाले आहे, तर अशा प्रकरणात सुधारित बांधकाम परवानगी कशी देता येऊ शकते? नगरपालिकेने डॉक्टरांना पळवाट का दिली?”
असे असतानाही एमआरटीपी कायद्यानुसार सदर बांधकाम परवानगी रद्द करण्याचे आदेश मुख्याधिकारी यांनी दिलेले नाहीत, यामुळे नगरपालिकेची भूमिका संशयास्पद ठरत आहे.
या पार्श्वभूमीवर मुख्याधिकारी यांच्या आदेशाविरोधात मा. उच्च न्यायालयात दाद मागण्याच्या हालचाली सामाजिक कार्यकर्ते सोहेल शेख यांनी सुरू केल्याचे समजते.
✍🏻मुख्य संपादक – शशिकांत खरात
